ТИМ НА ЉУБЕЗНОСТ

Тони има завршено Бизнис менаџмент, претседател е на ЗГ ЉУБЕЗНОСТ, посветен на хуманитарниот повик уште од самите почетоци како иницијатива. Практикувањето на вистинските вредности на сочувство и помагање, му се вистински двигател секојдневно. Поддршката на бездомните и социјално загрозените му се повеќе отколку само обична работа.

Димитар има академско знаење во делот на финансии, искуство во работење во различни сектори и аналитички способности. Тој има практично познавање на проблематиката на сиромаштијата и социјалната исклученост и е мотивиран преку неговиот ангажман во Љубезност да им помогне на луѓето кои се соочуваат со овие животни предизвици, затоа што и тој самиот порано бил еден од нив.

Весна има завршено педагошки факултет, ги координира активностите во здружението, покажувајќи искрена грижа за колегите и крајните корисници. Нејзиниот оптимистички и охрабрувачки дух, нејзиното сочувствително и разбирливо срце, изразени се на многу начини, особено во нејзиниот ангажман во поддршка на бездомни и социјално загрозени семејства и поединци.

Џејлан долго време се бави со активизам, особено насочен кон работнички права и социјална правда. Низ годините била дел од многу иницијативи, движења и различни облици на организираност на граѓаните. Низ активизмот подобро се запознава со животот на бездомните лица и социјално загрозените категории, со кои воспоставува врска на основа на емпатија и солидарност. Верува во вредностите како што се, еднаквоста, рамноправноста, другарството, заедничарењето и колективизмот, поаѓајки од тоа дека подобар свет е можен и неопходен.

Жана е дипломиран социолог и магистар по менаџмент на човечки ресурси. Во рамки на здружението, таа активно работи на поддршка при вработување на ранливи категории граѓани, помагајќи им да ги развијат своите вештини и да се интегрираат на пазарот на труд. Со својот аналитички пристап и разбирање на општествените процеси, придонесува кон креирање можности за одржлива социјална инклузија. Нејзината посветеност и емпатија се клучни во работата со корисниците кои се соочуваат со социјални и економски предизвици.

Филип е дипломиран социјален работник, со силна посветеност кон поддршка на ранливите категории граѓани. Преку своето знаење и практично искуство, активно придонесува во идентификување на потребите на корисниците и обезбедување соодветна помош. Неговата емпатија, трпение и искрена желба да помогне го прават важен дел од тимот на Љубезност.

Ивана е дипломиран психолог и магистрант по психологија, со интерес и посветеност кон менталното здравје и благосостојбата на поединците. Таа активно придонесува во обезбедување психолошка поддршка на корисниците, особено на оние кои се соочуваат со тешки животни околности. Нејзиниот пристап е внимателен, разбирачки и насочен кон градење доверба.

Игор е задолжен за техничка поддршка, поправки и санации, обезбедувајќи подобри услови за живот на корисниците. Со својата практичност, посветеност и подготвеност да помогне, директно придонесува кон подобрување на секојдневието на лицата во социјален ризик. Неговата работа често значи создавање безбедна и функционална средина за оние на кои тоа најмногу им е потребно.

Елена е дипломиран и магистриран економист, која претходно ја извршуваше улогата на координатор на Центарот за социјална инклузија „Дренак“, а денес е задолжена за видливоста на организацијата на социјалните мрежи. Преку своето искуство, таа успешно ги организираше и спроведуваше активности насочени кон поддршка и интеграција на ранливите категории граѓани. Во својата тековна улога, посветено работи на приближување на мисијата на здружението до пошироката јавност, со цел подигнување на свеста и поттикнување на поемпатичен и похуман однос кон бездомните лица и социјално загрозените групи.