Шест души под еден покрив, а тој покрив – не знаеш дали повеќе штити од дожд или пропушта. Живеат од тоа што ќе се најде. А што да се најде? Летно време, таткото и мајката аргатуваат по туѓи ниви, по туѓи домови, како помошници. Цел ден под сонце, а навечер дома четири мали душички ги чекаат со раширени очи и празни чинии. И сепак, не се жалат. Ниту еднаш. Го носат животот во тишина, со почит, со трпение што ретко се гледа.
А купатило? Е, таму зборот „купатило“ само како име им стоеше. Немаше чешма, немаше вода, немаше светло. Само ѕидови, ко да се соба без живот. Секое капење било мака, секоја капка вода носена со канти, секоја ноќ со свеќа во рака. Замисли да ги капеш четири деца без вода и без светло??!!!. Замисли!!!
Ама дојде моментот. Пред некое време, во еден претопол ден, им ја средивме таа просторија што дотогаш била само по име купатило. Поставивме чешма и потече вода! Не со сила, туку со душа. А децата? Стоеја пред чешмата ко пред нешто свето. Најмалото праша: „Мамо, ова сега наше е?“
А Сендита? Таа не можеше да каже ништо. Само ја зеде раката на детето и ја стави под водата. „Види, душо. Види што значи кога животот ќе те погали по глава.“
И светлото! Штедливи сијалици светнаа таму каде што порано ѕидовите беа облечени во сенки. Не беше тоа само светлина – беше блесок на надеж. Децата скокаа, викаа „Мамо, сè гледаме!“, а едното момче рече: „Сега можеме и сами да се истушираме, не мора да чекаме ден!“
Тоа беше момент кога срцето ни се наполни. Не со гордост. Со љубов.
И гледај, сега тие луѓе што вчера немаа ни капка вода, ни зрак светло, денес имаат нешто многу повеќе. Имаат чувство дека некој ги гледа. Дека некој рекол: Доста беше! Некогаш најголемото богатство не е злато, ниту пари, туку една чешма во купатило и светло што ќе ти покаже дека и ти, и твоето семејство, заслужувате повеќе.
Ние како тим и понатаму остануваме заедно да се бориме за подобар живот на најранливите.
Им благодариме на РРЦ – Ромски Ресурсен Центар | RRC – Roma Resource Center, нашата партнерска организација. Реализацијата на активностите е овозможена со финансиска поддршка од Сојузното Министерство за труд, социјални работи, здравство, грижа и заштита на потрошувачите на Република Австрија во РСМ, преку проектот #ComHome.
